ВНИМАВАЈТЕ НА СВОЕТО СРЦЕ

Мерење на крвниот притисок дома

Секој од нас има само едно срце, а најчесто го поврзуваме со љубов. Срцето пумпа крв низ вените и делува како мотор којшто ни ја дава енергијата што ни е потребна за креативност и работа секој ден. Морате добро да се грижите за срцето ако сакате да продолжи да чука уште долго време. Еден начин да го направите ова е да го измерите крвниот притисок дома.

ПЕТ ПРИЧИНИ ЗА МЕРЕЊЕ НА КРВНИОТ ПРИТИСОК ДОМА

1. Може да добиете рана дијагноза на висок крвен притисок (хипертензија).
2. Може да му помогнете на лекарот соодветно да управува со вашето лекување.
3. Може да ги споредите вредностите измерени дома со оние измерени во ординација.
4. Може да ја подобрите контролата на високиот крвен притисок.
5. Може да поминувате помалку време во ординација.

КАКО ПРАВИЛНО ДА ГО ИЗМЕРИТЕ КРВНИОТ ПРИТИСОК ДОМА

Користете добар апарат за мерење на крвен притисок. Овие апарати се достапни во различни продавници.

1. Се препорачува мерење на крвниот притисок двапати на ден: наутро, најмалку 30 минути по будењето (ако земате антихипертензивни лекови, притисокот треба да се мери пред да ги земете лековите) и навечер. Не треба да јадете, да пиете кафе или алкохол и да пушите триесет минути пред мерењето.
2. Опуштете се 3 до 5 минути пред да го измерите крвниот притисок. Потоа седнете исправено, потпрете го грбот на столицата и останете опуштени.
3. Ставете ја раката на масата или столицата и опуштете ја.
4. Ставете ја манжетната директно на кожата, не врз облеката. Оставете доволно простор за да може да ставите еден прст под манжетната.
5. По првото мерење, почекајте една минута, па повторно измерете го притисокот. Ако двата резултати се значително различни, повторно измерете го притисокот.
6. Запишете ги просечните измерени вредности во дневникот за крвен притисок и покажете му ги на лекар при следната посета.
7. Секогаш мерете го притисокот во исто време и на иста рака.

Разговарајте со вашиот лекар за тоа што да направите ако вашиот просечен крвен притисок е > 135/85 mm Hg.

ЗАЕДНО ВО ИДНИНАТА

Мерењето на крвниот притисок дома не е тешко, но не може да ги замени редовните лекарски прегледи. Редовното мерење дома ќе ви даде претстава за вашиот крвен притисок. Ако вашиот крвен притисок е под целната граница, тоа значи дека добро се грижите за вашето здравје. На долг рок, навременото откривање и лекување на високиот крвен притисок значително го намалува ризикот од кардиоваскуларни компликации, како што се миокарден инфаркт или мозочен удар.

Литература

1. Williams B, Mancia G, Spiering W et al. 2018 Practice Guidelines for the management of arterial hypertension of the European Society of Cardiology and the European Society of Hypertension. Blood Press 2018; 27(6): 314−340.
2. Stergiou GS, Palatini P, Parati G et al. European Society of Hypertension Council and the European Society of Hypertension Working Group on Blood Pressure Monitoring and Cardiovascular Variability. 2021 European Society of Hypertension practice guidelines for office and out-of-office blood pressure measurement. J Hypertens 2021; 39(7): 1293-1302.