Проблеми поврзани со крвниот притисок

Високиот крвен притисок, односно хипертензија, често се јавува без претходно предупредување. Затоа само половина од пациентите добиваат дијагноза, а бидејќи се чувствуваат релативно добро, го одложуваат лекувањето или не ја земаат редовно терапијата. Во меѓувреме, болеста продолжува да ги зафаќа органите и се подготвува да го предизвика првиот кардиоваскуларен настан, којшто може да биде фатален.

ХИПЕРТЕНЗИЈА – ТИВОК УБИЕЦ

Хипертензијата е најчеста хронична болест во развиениот свет и водечка причина за прерана смрт во светот.

Знаците на хипертензија вклучуваат главоболка, вртоглавица, замор, палпитации, лош сон, зуење во ушите, крварење од носот и стегање во градите. Сепак, луѓето со хипертензија обично немаат симптоми, поради што болеста често се открива доцна. Ова е причината зошто многу пациенти со новодијагностицирана болест веќе имаат оштетувања на целните органи (крвни садови, срце, мозок, бубрези, очи). Многу пациенти почнуваат сериозно да ја сфаќаат својата состојба дури откако промените во целниот орган почнуваат да се манифестираат на различни начини. Во тој момент, болеста веќе има достигнато степен од кој не е можно целосно закрепнување.

Оштетување на крвните садови

Артериите стануваат вкочанети и имаат стеснет лумен поради постојаниот притисок. Како резултат на тоа, протокот на крв во сите делови на телото е намален.

Оштетување на мозокот

Намалениот или дури и прекинат протокот на крв во мозокот поради згрутчување на крвта може да предизвика мозочен удар, што може да резултира со деменција.

Оштетување на очите

Високиот крвен притисок често ги оштетува ситните и нежни крвни садови на окото. Ова може да предизвика крварење во задниот дел на окото, заматен вид и целосно губење на видот.

Оштетување на срцето

Кога крвниот притисок е висок, срцевиот мускул мора да работи многу понапорно за да циркулира крвта. Се прилагодува на зголемениот напор така што прво ја зголемува својата маса, а потоа претрпува промени (на пр. срцева слабост). Во тој момент, срцето веќе не може да го обезбеди потребниот проток на крв во телото. Ако не се лекува, намаленото снабдување со крв во срцевиот мускул (коронарна артериска болест) може да доведе, меѓу другото, до ангина или до срцев удар.

Оштетување на бубрезите

Променетите крвни садови предизвикуваат оштетување на бубрезите, поради што се намалува количината на отпадни материи што се елиминираат од крвта. Доколку телото задржува отпад и опасни материи, може да биде потребна дијализа или трансплантација на бубрег.

ДЕЛУВАЈТЕ ДОДЕКА СÈ УШТЕ ИМАТЕ ВРЕМЕ!

На пациентите со оштетување на целниот орган може да им се помогне со забавување на стапката на прогресија на оштетувањето, со што може да се спречат посериозни компликации. Затоа е важно да се обидете да спречите неповратни промени. Најважно е да се открие хипертензијата што е можно поскоро и да не се одложува лекувањето.

Редовното мерење на крвниот притисок и известувањето на вашиот лекар кога ќе ви се зголеми крвниот притисок е важно за откривање на хипертензија. Ако вашиот лекар ви препише терапија, ваша одговорност е да ги следите неговите упатства, иако можеби се чувствувате совршено здрави. Редовниот и ефективен третман може да спречи кардиоваскуларни настани и да го продолжи животот.

Литература

1. Ezdravje: Naj krvni tlak ne nadzoruje našega življenja [internet]. [cited 2021 Jun 28]. Available from: https://www.ezdravje.com/novosti/srce-in-zilje/naj-krvni-tlak-ne-nadzoruje-nasega-zivljenja/4788/
2. Erdine S. How well is hypertension controlled in Europe. ESH Scientific Newsletter 2007; 8: 3.
3. Prakash D. Target organ damage in newly detected hypertensive patients. J Family Med Prim Care  2019; 8(6): 2042-2046.
4. Brunc M, Iztok G. 8. posvet o kronični bolezni srca z mednarodno udeležbo [internet]. Novo mesto: Društvo za izobraževanje in raziskovanje v tujini; 2013 [cited 2021 Jun 28]. Available from: http://www.boleznisrca.com/media/simpozij_arhiv/Zbornik_2013.pdf
5. Mills KT, Stefanescu A, He J. The global epidemiology of hypertension. Nat Rev Nephrol 2020; 16, 223–237.
6. Za kaj ti bije srce: Simptomi visokega krvnega tlaka [internet]. [cited 2021 Jun 28]. Available from: https://zakajtibijesrce.si/high_pressure/high-third-post/
7. Williams B, Mancia G, Spiering W et al. 2018 ESC/ESH Guidelines for the management of arterial hypertension. European Eur Heart J 2018; 39(33): 3021–3104.
8. FSH: Hypertension: the silent killer [internet]. Chicago: First stop health; 2012 [cited 2021 Jun 28]. Available from: https://www.fshealth.com/blog/hypertension-silent-killer
9. Vita: Povišan krvni talk in okvare srčno-žilnega sistema [internet]. [cited 2021 Jun 28]. Available from: https://www.revija-vita.com/vita/39/Povi%C5%A1an_krvni_tlak_in_okvare_sr%C4%8Dno-%C5%BEilnega_sistema
10. Mayo Clinic: High blood pressure dangers: Hypertension’s effects on your body [internet]. Mayo Foundation for Medical Education and Research; 2019 [cited 2021 Jun 28]. Available from: https://www.mayoclinic.org/diseases-conditions/high-blood-pressure/in-depth/high-blood-pressure/art-20045868
11. EZdravje: Depresija in koronarna bolezen [internet]. [cited 2021 Jun 28]. Available from: https://www.ezdravje.com/dusevno-zdravje/depresija/depresija-in-koronarna-bolezen/?s=2